ໃນຕອນບ່າຍຂອງວັນທີ 25 ຕຸລາ 2024 ທີ່ຄະນະວິທະຍາສາດປ່າໄມ້, ມະຫາວິທະຍາໄລແຫ່ງຊາດລາວ. ໄດ້ຈັດພິທີສະຫຼຸບຊຸດຮຽນ 2020-2024, ເປີດສົກຮຽນສົກຮຽນ 2024-2025, ສະເຫຼີມສະຫຼອງວັນຄູແຫ່ງຊາດ 7 ຕຸລາ ໂດຍຈັດຂຶ້ນທີ່ ຫ້ອງປະຊຸມໃຫຍ່ ຂອງຄະນະວິທະຍາສາດປ່າໄມ້, ໃຫ້ກຽດເປັນປະທານໂດຍທ່ານ ຮສ. ປອ. ເດຊານຸລາດ ແສນດວງເດດ ເລຂາພັກມະຫາວິທະຍາໄລແຫ່ງຊາດ, ວ່າການແທນ ອະທິການບໍດີ ມະຫາວິທະຍາໄລແຫ່ງຊາດ. ນອກຈາກນີ້ກໍ່ມີບັນດາທ່ານ ຄະນະບໍດີ, ຮອງຄະນະບໍດີ, ຫົວໜ້າພາກວິຊາ, ຮອງຫົວໜ້າພາກວິຊາ, ຫົວໜ້າພະແນກ ແລະ ຮອງຫົວໜ້າພະແນກ ພ້ອມດ້ວຍພະນັກງານ-ຄູອາຈານ ແລະ ນັກສຶກສາພາຍໃນຄະນະວິທະຍາສາດປ່າໄມ້ກໍ່ໄດ້ເຂົ້າຮ່ວມຢ່າງຟົດຟື້ນ. ໃນພິທີດັ່ງກ່າວ ທ່ານ ສຈ. ປອ. ລັດສະໝີ ບຸບຜາ ຄະນະພັກມະຫາວິທະຍາໄລແຫ່ງຊາດ, ຄະນະບໍດີຄະນະວິທະຍາສາດປ່າໄມ້ ໄດ້ຂຶ້ນຜ່ານບົດສະຫຼຸບຜົນງານປະຈຳສົກຮຽນ 2023-2024 ແລະແຜນການ 2024-2025 ໂດຍສະເພາະແມ່ນ ສະພາບລວມໃນການຈັດຕັ້ງປະຕິບັດວຽກງານໃນສົກຮຽນຜ່ານມາ, ເຊິ່ງເຫັນໄດ້ວ່າເຮັດໄດ້ດີສົມຄວນ ວຽກງານຕ່າງໆໄດ້ຖືກຈັດຕັ້ງປະຕິບັດ ແລະ ມີຜົນສຳເລັດຕາມຄາດຫມາຍ ທັງນີ້ກໍ່ເນື່ອງຈາກວ່າ ມີການວາງແຜນ ຂອງແຕ່ລະພາກສ່ວນຢ່າງຊັດເຈນ ຈຶ່ງສາມາດຈັດຕັ້ງປະຕິບັດ ແລະ ຕິດຕາມການເຄື່ອນໄຫວ. ຄູ ແລະ ພະນັກງານ ມີຄວາມກະຕືລືລົ້ນໃນການຊອກຫາໂອກາດ ແລະ ເງື່ອນໄຂ ເພື່ອເພີ່ມຄວາມຮູ້ ຄວາມສາມາດຂອງຕົນຢູ່ຕະຫລອດເວລາ. ການຈັດຕັ້ງການຮຽນ-ການສອນເປັນຮູບແບບໂມດູນ ສົ່ງຜົນໃຫ້ຄູອາຈານ ສາມາດຈັດສັນເວລາ ໃນການປະຕິບັດວຽກງານໄດ້ສະດວກຂຶ້ນກວ່າເກົ່າ. ນອກຈາກນີ້ຍັງໄດ້ຕີລາຄາຕໍ່ບັນຫາ ຂໍ້ຄົງຄ້າງ ແລະ ສາເຫດຄວາມຫຍຸ້ງຍາກ ຍັງຈະຕ້ອງໄດ້ສືບຕໍ່ຈັດຕັ້ງປະຕິບັດເຊັ່ນ:
ເນື່ອງຈາກສະພາບການປ່ຽນແປງທາງດ້ານເສດຖະກິດຕົກຕໍ່າ ເຮັດໃຫ້ມີຜົນກະທົບຕໍ່ຊີວິດຄວາມ ເປັນຢູ່ຂອງປະຊາຊົນເວົ້າລວມ ພະນັກງານ-ຄູ ຈຳນວນຫນຶ່ງຂາດກຳລັງໃຈໃນການເຮັດວຽກ, ການປັບປຸງພາລະບົດບາດ ແລະ ຊັບຊ້ອນຕຳແໜ່ງງານຍັງບໍ່ທັນສໍາເລັດ ເນື່ອງຈາກ ຂະບວນການໃຊ້ເວລາດົນ, ການພັດທະນາ ແລະ ປັບປຸງຫຼັກສູດຍັງຈຳນວນໜຶ່ງບໍ່ສຳເລັດຕາມແຜນການ ເນື່ອງຈາກ ມີການຍົກຍ້າຍໄປຮຽນ ຫຼື ປ່ຽນໜ້າທີ່, ການສະໜອງສິ່ງອຳນວຍຄວາມສະດວກແກ່ການຮຽນ-ການສອນ ແລະ ການປັບປຸງພຶ້ນຖານໂຄງລ່າງທີ່ຈຳເປັນ ຍັງເຮັດບໍ່ໄດ້ດີເທົ່າທີ່ຄວນ ເນື່ອງຈາກຂາດງົບປະມານ ລາຄາສິນຄ້າ ແລະ ບໍລິການເປັນໄປຕາມກົນໄກການຕະຫຼາດ ແຕ່ອັດຕາເກັບລາຍຮັບ ເທົ່າເດີມ ແລະ ຈຳນວນນັກສຶກສາໜ້ອຍລົງ, ຄວາມສຳເລັດການສຶກສາຂອງນັກສຶກສາ ລະດັບປະລິນຍາໂທ ແລະ ເອກ ມີອັດຕາການຮຽນຈົບໜ້ອຍ ເນື່ອງຈາກຫຼາຍສາເຫດ ຕົ້ນຕໍແມ່ນຄວມຮັບຜິດຊອບຂອງນັກສຶກສາບາງຄົນຍັງຖືເບົາເຮັດໃຫ້ເວລາແກ່ຍາວ ຫຼື ບໍ່ມີຄວາມຄືບໜ້າປະລະການຮຽນ. ສະລັບແຜນການປະຈໍາສົກຮຽນ 2024-2025, ເພື່ອຈັດຕັ້ງປະຕິບັດແຜນຍຸດທະສາດຂອງຄປມ ແລະມະຫາວິທະຍາໄລແຫ່ງຊາດວາງອອກ ໃຫ້ມີຜົນສໍາເລັດອັນດີ ແລະ ສ້າງໃຫ້ຄປມ ໃຫ້ກາຍເປັນສະຖາບັນການສຶກສາ ນໍາໜ້າໃນດ້ານການຮຽນ-ການສອນທີ່ມີຄຸນນະພາບ ແລະ ດ້ານການຄົ້ນຄວ້າວິທະຍາສາດກ່ຽວກັບຊັບພະຍາກອນປ່າໄມ້ ແລະ ສິ່ງແວດລ້ອມ ໃຫ້ມີລະດັບມາດຕະຖານສູງຂື້ນ ສາມາດເຊື່ອມໂຍງກັບພາກພື້ນ ແລະ ສາກົນ.
