ວັນທີ 05.10.2022 ຄະນະວິທະຍາສາດປ່າໄມ້, ມະຫາວິທະຍາໄລແຫ່ງຊາດ ໄດ້ຈັດງານພິທີສະຫຼຸບສົກ ຮຽນ 2021-2022, ເປີດສົກຮຽນ 2022-2023 ແລະ ສະຫຼອງວັນຄູແຫ່ງຊາດ 07 ຕຸລາ 2022.
ໃຫ້ກຽດເປັນປະທານໂດຍ ທ່ານ ສຈ ປອ ນ. ລັດສະໝີ ບຸບຜາ, ຄະນະບໍດີ ຄະນະວິທະຍາສາດປ່າໄມ້, ມະຫາວິທະຍາໄລແຫ່ງຊາດ, ເຊິ່ງໃນງານມີຜູ້ເຂົ້າຮ່ວມມີ ຄູອາຈານ, ພະນັກງານ, ນັກສຶກສາທີ່ຈົບໃໝ່ ແລະ ນັກສຶກສາທີ່ກຳລັງສຶກສາ ພາຍໃນຄະນະວິທະຍາສາດປ່າໄມ້.
ທ່ານ ສຈ ປອ ສີທອງ ທອງມະນີວົງ ຮອງຄະນະບໍດີ ຄະນະວິທະຍາສາດປ່າໄມ້, ໄດ້ຂຶ້ນຜ່ານບົດສະຫຼຸບ ການຈັດຕັ້ງປະຕິບັດແຜນພັດທະນາການສຶກສາ ສົກປີ 2021-2022 ແລະ ແຜນການຈຸດສຸມປະຈຳສົກຮຽນ 2022-2023 ເຊິ່ງວ່າ ໃນສົກປີ 2021-2022 ມີນັກສຶກສາທີ່ສຳເລັດການສຶກສາທັງໝົດ 148 ຄົນ ເປັນ ຍິງ 79 ຄົນ ໃນນັ້ນມີ ລະດັບປະລິນຍາໂທ ຈຳນວນ 4 ຄົນ, ປະລິນຍາຕີ 141 ຄົນ ແລະ ອະນຸປະລິນຍາ 3 ຄົນ.
ພາຍຫຼັງຜ່ານບົດສະຫຼຸບ ແລະ ແຜນການຈຸດສຸມແລ້ວ, ໃນງານກໍຍັງໄດ້ມີ ການສະຫຼອງວັນຄູແຫ່ງຊາດ 07 ຕຸລາ ເຊິ່ງ ທ່ານ ສຈ ປອ ນ. ລັດສະໝີ ບຸບຜາ ໄດ້ຂຶ້ນເລົ່າເຖິງປະຫວັດຄວາມເປັນມາຂອງງານວັນຄູແຫ່ງຊາດ ເພື່ອລະນຶກເຖິງຄຸນງາມຄວາມດີຂອງຄູຜູ້ສິດສອນໃນອະດີດຜ່ານມາຈົນເຖິງປະຈຸບັນ.
ໃນວາລະສຸດທ້າຍຂອງງານ ທ່ານ ຄະນະບໍດີ ຄະນະວິທະຍາສາດປ່າໄມ້ ຍັງໄດ້ກ່າວໃຫ້ຄຳໂອວາດ ຕໍ່ພະນັກງານຄູອາຈານ ແລະ ນັກສຶກສາທີ່ຈົບໃໝ່ ພ້ອມທັງນັກສຶກສາທີ່ກຳລັງສຶກສາຢູ່ ເພື່ອເປັນທິດຊີ້ນຳໃນການ ປະຕິບັດໜ້າທີ່ຂອງຕົນເອງໃນອະນາຄົດ ແລະ ໄດ້ກ່າວປິດພິທີຢ່າງເປັນທາງການ.
