ໃນວັນທີ 03 ຕຸລາ 2023, ຄະນະວິທະຍາສາດປ່າໄມ້, ມະຫາວິທະຍາໄລແຫ່ງຊາດ ໄດ້ຈັດພິທີປິດ-ເປີດ ສົກຮຽນໃໝ່ ປະຈຳປີຮຽນ 2023-2024, ການຈັດພິທີດັ່ງກ່າວມີ 3 ຈຸດປະສົງຄື:
- ສະຫຼຸບຊຸດຮຽນ ປີ 2019-2023
- ເປີດສົກຮຽນ 2023-2024
- ສະເຫຼີມສະຫຼອງວັນຄູແຫ່ງຊາດ ທີ 07 ຕຸລາ, ຄົບຮອບ 29 ປີ
ເຊິ່ງໃຫ້ກຽດເປັນປະທານໂດຍ ທ່ານ ຮອງສາດສະດາຈານ.ປອ. ເດຊານຸລາດ ແສນດວງເດດ, ຮອງອະທິການບໍດີ, ມະຫາວິທະຍາໄລແຫ່ງຊາດ, ໂດຍມີ ທ່ານ ຄະນະບໍດີ, ຮອງຄະນະບໍດີ, ຄູອາຈານ-ພະນັກງານ ແລະ ນັກສຶກສາພາຍໃນຄະນະວິທະຍາສາດປ່າໄມ້ເຂົ້າຮ່ວມ.
ໃນພິທີ ທ່ານ ສາດສະດາຈານ.ປອ.ນ.ລັດສະໝີ ບຸບຜາ, ຄະນະບໍດີ ຄະນະວິທະຍາສາດປ່າໄມ້, ມະຫາວິທະຍາໄລແຫ່ງຊາດ ໄດ້ຂຶ້ນລາຍງານສະຫຼບຕີລາຄາຜົນງານປະຈຳສົກຮຽນ ແລະ ແຜນການປະຈໍາສົກຮຽນ 2023-2024. ຕະຫຼອດຊ່ວງສົກການສຶກສາ ຄູອາຈານພາຍໃນຄະນະວິທະຍາສາດປ່າໄມ້ ໄດ້ມີຄວາມຕັ້ງໜ້າຢ່າງຫ້າວຫັນໃນການຈັດຕັ້ງປະຕິບັດເພື່ອປະກອບສ່ວນໃນການສ້າງ ແລະ ພັດທະນາບຸກຄະລາກອນຂອງຊາດໂດຍຜ່ານວຽກງານການສິດສອນ, ການຄົ້ນຄວ້າວິທະຍາສາດ ແລະ ການບໍລິການວິຊາການ. ໃນສົກສຶກສາ 2022-2023 ຄະນະວິທະຍາສາດປ່າໄມ້ມີ ນັກສຶກສາຮຽນຈົບທັງໝົດ 86 ຄົນ ເຊິ່ງໃນນັ້ນມີ ລະດັບປະລິນຍາໂທ 11 ຄົນ, ປະລິນຍາຕີ 75 ຄົນ/ຍິງ 51 ຄົນ. ໃນສົກ 2022-2023 ພະນັກງານ-ຄູອາຈານທີ່ມີຜົນງານດີເດັ່ນ ປະເພດໜຶ່ງ ມີ 66 ທ່ານ, ປະເພດສອງມີ 11 ທ່ານ ແລະ ຄູອາຈານທີ່ມີຜົນງານດີເດັ່ນໃນການປະກອບສ່ວນງົບປະມານໃນການ ພັດທະນາ ຄະນະວິທະຍາສາດປ່າ ໄມ້ຈຳນວນ 12 ທ່ານ, ໂຄງການຄົ້ນຄວ້າ ທັງໝົດ 8 ໂຄງການ ແລະ ການບໍລິການວິຊາການ ທັງໝົດ 6 ກິດຈະກຳ. ພ້ອມດຽວກັນນັ້ນ ທ່ານ ສຈ.ປອ.ນ.ລັດສະໝີ ບຸບຜາ, ຄະນະບໍດີ ຄະນະວິທະຍາສາດປ່າໄມ້, ມະຫາວິທະຍາໄລແຫ່ງຊາດ ຍັງໄດ້ເວົ້າ ເຖິງປະຫວັດຄວາມເປັນມາຂອງວັນຄູແຫ່ງຊາດ 07 ຕຸລາ ແລະ ໄດ້ກ່າວຄຳອວຍພອນໃຫ້ແກ່ພະນັກງານຄູອາຈານ ພາຍໃນ ຄະນະວິທະຍາສາດປ່າໄມ້ ເນື່ອງໃນໂອກາດ ຄົບຮອບ 29 ປີ ທີ່ໝູນວຽນມາເຖິງ.
ຫຼັງຈາກຮັບຟັງການລາຍງານຂອງ ທ່ານ ສຈ.ປອ.ນ.ລັດສະໝີບຸບຜາ, ຄະນະບໍດີ, ຄະນະວິທະຍາສາດປ່າໄມ້ ສຳເລັດ. ທ່ານຮອງອະທິການບໍດີ, ມະຫາວິທະຍາໄລແຫ່ງຊາດ ກໍໄດ້ໃຫ້ກຽດໃຫ້ຄຳໂອວາດ, ໂອ້ລົມ ແລະ ຊົມເຊີຍຕໍ່ກັບຜົນສຳເລັດທີ່ຍາດມາໄດ້ ແລະ ພ້ອມດຽວກັນນັ້ນຍັງໄດ້ໃຫ້ທິດເຍືອງທາງຕໍ່ ກັບ ບັນຫາຂໍ້ຄົງຄ້າງຂອງປີຜ່ານມາ ໃຫ້ແກ່ຄູອາຈານ ແລະ ນັກສຶກສາ ຂອງຄະນະວິທະຍາສາດປ່າໄມ້ ໃນການປັບປຸງ ແລະ ແກ້ໄຂ ເພື່ອການພັດທະນາຊັບພະຍາກອນມະນຸດ ຂອງຄະນະວິທະຍາສາດປ່າໄມ້ ກໍຄືມະຫາວິທະຍາໄລແຫ່ງຊາດ ໃຫ້ກ້າວຂຶ້ນຕໍ່ໄປ. ໃນຕອນທ້າຍພ້ອມດຽວກັນນັ້ນ ທ່ານຮອງອະທິການບໍດີ ໃນນາມປະທານກໍໄດ້ກ່າວປິດພິທີຢ່າງເປັນທາງການ.
